Kaan me Dard ka Gharelu Ilaj aur Upchar – Ear pain door karne ka tarika aur totka

0

Kaan me dard hona yani earache ek bahut hi samanaya samasaya hai aur ye bhi sach hai ki duniya mein har kisi ko kabhi na kabhi unki life is dard ka samna karna padta hai. Agar aankdo ki mane to duniya mein 70 percent chote bacho ko 1-3 saal ke beech kaan me dard hota hai. Ye ek dardnaak aur rogi ko pareshan kar dene wali problem hai jiske bahut se karan ho sakte hein jaise infection, ear ki safai ka dheyan na rakhna, koi chot lag jana, sinus infection, daant ki problem aadi. Karan chahe jo koi bhi ho agar aapka dard bahut hi tej hai ya aap lambe samay se is dikkat se pareshan hein to ise kisi ache ENT specialist ko jald dikha dena chahiye. Kyonki kayi stithiyon mein aage chalkar behrapan tak ho sakta hai. Agar aapki problem halki fulki hai to aap ise gharelu ilaj aur desi upachar ke upay use karke apne ghar mein hi isse mukti paa sakte hein. Aaiye sabse pehle jaan lete hein ki kaan ke dard ke wo konse karan hein jinse ye ashehniya dard hota hai.

kaan dard

Kaan me dard ke karan | Earache causes in Hindi

Kaan ke dard ke sahi karan ka pata hone se aapko uske ilaj mein bahut madad milti hai. Karan ka pata aap apne doctor se mil kar bhi laga sakte hein. Yaha kuch aise causes hein jo is samasaya ke liye jayadatar jimedaar hote hein.

  • Kaan ki nali mein ghav
  • Khushki hona
  • Ear canal mein infection hona
  • Kisi cheez ka ear mein fas jana
  • Kaan mein jayda mail hona
  • Kaan ke parde ka fat jana (perforated eardrum)
  • Ear drum mein inflammation hona
  • Gala kharab (throat infection) hone se bhi ye samasaya ho jati hai
  • Sinus infection ke dwara
  • Pressure ke badlav ke karan kan mein injury ho jana
  • Daant mein dard ya infection hone par
  • Sardi jukham ke karan (due to cold)
  • Kaan saaf karte waqt chot lag jana
  • Teekhi cheez ya koi infected cheez se ear ki safai karna – jisse ear canal mein ghav aur infection ho hati hai
  • Funsi hona
  • Kisi tantrika (nerve) ko nuksan hone ke karan

Khate(eating), nigalte(swallowing)  aur jambhai (yawning) lete samay kaan mein dard ka kya karan hai?

loading...

Agar aapko khate samay ya nighlte samay ya yawn karte samay tej dard hota hai to iska karan gala kharab hona ho sakta hai. Aapka kan Eustachian tube dwara aapke gale se juda hota hai. Jab aapka gale mein infection hota hai ya gala kharab hota hai tab is nail mein blockage ho jata hai jiske falsavroop aapke kaan mein pressure badhjata hai aur aapko dard jhelna padta hai.

Kaan Ke dard ka gharelu ilaj aur Upchar ke upay | Ear pain treatment in Hindi | Kaan me dard ke totke

Jaisa ki humne pehle aapko bataya hai ki samasaya jayada serious hone par ya sahi karan ka pata lagane ke liye aap doctor se apne ear ki jaanch karvayein aur unki salah ke anusaar koi pain killer, allergy ki daawa ya koi antibiotic lein. Lekin yadi aapki samasaya normal hai tab aap neeche diye gaye gharelu totke aur upay use karke apna upachar kar sakte hein.

Ajwain hai kaam ki Cheez

Ajwain ko English mein caraway ya carom seeds ya bishop’s weed seeds kaha jata hai. Isme infection khatam karne wale aur kitanuo se ladne wale gun hote hein. Saath hi isme kudrati dard nivarak gun hote hein jo ki aapki problem mein kafi helpful sabit ho sakte hein.

Aap ek part ajwain ke lein aur 3 parts til ke tel ke lein. Ajwain ko tel mein daal kar halka garam karke kuch der ke liye rakhein taki ajwain ke gun us tel mein mil jayein. Ab is tel ko chan kar iske 2-2 drops dono ears mein daal lijiye.

Doosra nuskha/totka ye hai ki  aadhe spoon ajwain ko 2 spoon sarso ke tel ke saath garam kijiye. Ismein thode lehsun ke pieces bhi daal dijiye. Ab mixture ko tab tak garam kijiye jab tak lehsun laal na ho jaye. Is tel ko chan ka rise pain relief dear drops ki tarah istemal kariye.

Tulsi for Ear Pain

Tulsi  bharat ke lag bhag har ghar mein paya jane wala paudha hai. Ye apni aushdhiya guno ke karan jana jata hai. Isme dard ko sunn karne wale, bacteria khatam karne wale aur inflammation ghatane wale gun hote hein. Ye aapke kaan se infection aur inflammation ghata kar aapko chain ki saans deti hai. Baas aapko kuch tulsi ke patte lene hai aur inhe ache se dhokar inkar ras nikal lena hai. Is ras ki 3-4 drops us kaan mein daalni hai jisme pain ho raha ho. Ye totka aapko relief dega.

Neem se kariye Ilaj

Tulsi ki tarah neem mein bhi kamal ke aushidhiya gun paye jate hein. Neem mein bacterial aur fungal infection ko khatam karne ki shakti hoti hai. Saath hi iske kamal ke pain killer gun aapko jaldi rahat dila sakte hein. Bas neem ki kuch taji hari pattiyan todiye aur inka ras nikal lijiye. Is ras ko apne kaan mein daliye. Aapki samasaya kam hogi. Yadi aapke paas neem ka tel hai to aapko use ek choti se cotton ball par lagana hai. Is baal ko apne ear mein kuch der rakh kar faink dena hai. Ye infection hatakar dard rok dega.

Taap se Milega Aaram

Garam sek karne se sujan aur dard kam hote hein.Aap garam sek dene ke liye plastic bottle mein garam pani bhar kar use kapde mein lapet kar aapne kaan par rakh sakte hein. agar aapke ghar mein hair dryer hai to to aap use low heat setting par set karke apne ear ke aas paas thodi der ke liye rakhiye. Uske taap se sujan aur pain kam honge. Aap garam pani mein towel bhigo kar use achi tarah neechodkar bhi istemal kar sakte hein.

Naak ko saaf karte rahiye

Aksar sardi jukham ki condition mein aapka naak band rehne se aapki Eustachian tube block ho jati hai jisse aapke kanke parde par pressure padta hai aur dard rehta hai. Is blockage ko door karne ke liye aapni naak saaf rakhiye. Iske liye aap nasal drops ka paryog bhi kar sakte hein. Chewing gum chabane se bhi tube ki blockage khulti hai aur aapke kaan par pressure kam hota hai.

Adhrak (ginger) Se lijiye Help

Adhrak mein natural dard nivarak aur inflammation ko kam karne wale gun hote hein. Joki aapki swelling aur pain kam karne mein kafai helpful sabit ho sakte hein.Aap ek chota tukda adhrak ka lijiye. Ise achi tarah se dhokar sukha lijiye. Ab iska ras nikal kar dropper mein bhar kar aapne kaan mein daal lijiye. Aap adhrak  ke ras ke ek part aur jaitun ke tel ke do parts ko aapas mein milaiye. Kuch der baar ise mishran ki 3-4 drops apne dard wale kaan mein daal lijiye.

Pudina

Pudina yani peppermint mein soothing, healing aur pain killing properties hoti hein. Aap pudine ke patte ka ras nikal kar apne ear mein daal sakte hein. Ya fir peppermint oil ko olive oil ke saath dilute karke ise cotton ki ball par lagake apne ear mein kuch der rakhne par aapko rahat mil sakti hai.

Pyaz ka ras

Pyax ke ras ko halka sa garam karke apne kaan mein dalne se dard chala jata hai. Kuch log pyaz ko garam gile kapde mein lappet kar apne ear ki sek karte hein. Aap ye dono tarike ek saath use kariye aapko aaram jaroor milega.

Herbal Steam Treatment

Yadi aapka naak band hai aur aapko sardi ya jukham ki shikayat hai to aap steam sungh kar aapni Eustachian nali ko khol kar apne ear par padne wale dabav ko kam kar sakte ho. Iske liye ek pot mein garm ubalte pani ko dalo aur usmein chamomile, lemon balm, tulsi jaisi kuch herbs daal kar uski steam ko inhale karo.

Lehsun hai upyogi

Lehsun ki dard mitane wali aur antibiotic properties aapki samsayako shigra khatam kar sakti hein. Sabse saral tarika ye hai ki aap lehsun ka ras nikal kar apne painful ear mein daliye. Doosra tarika ye hai ki aap ek teaspoon garlic pieces ko do tablespoons til ke tel ke saath kuch der garam kijiye. Ab is tel ko chan kar iski 2-3 bunde apne kaan mein daal lijiye.

Jaitun ka Tel (Olive Oil)

Jaitun ke tel ke gun aapki kaan mein khushki door karte hein aur infection ko bhi door karne mein sahayata karte hein. Aapko kuch drops jaitun ke tel ki aapne ears mein dalni hai. Isi parkar aap sarso ke tel ka bhi istemal kar sakte hein.

Apne doctor se miliye

Agar oopar diya hua koi bhi koi bhi upchar ya gharelu upay kaam nahi kar raha aur yadi aap bade hein aur aapki condition 5 din se kharab hai ya 8 saal se chote hein aur aapki condition 2 din se kharab hai to is case mein apne doctor ko turant dikhana chahiye. Gardan mein jakdan hone par ya fever hone par doctor ka ilaj aur bhi jaroori ho jata hai. Yadi aisa na kiya jaye to parinaam gambhir bhi ho sakte hein. Aksar aise cases mein rogi sunne ki shamta se haath dho bethta hai.

Kaan mein dard ke ilaj ke doosre upay |Bachav ke Tarike | Other remedies and Preventive Measures for Earache

  1. Multehi ke powder ko makkahan ke saath paka lijiye. Ise paste ko ane ear ke aas paas lagaiye.
  2. Mulli (radish) ke chote-chote tukdo ko sarso ke tel ke saath kuch der tak heat kijiye. Ab ise chaan kar tab apne kaan mein daliye jab wo halka sa garam ho. Ye bhi kaan ke dard ka asardaar ilaj hai.
  3. Aam ke patte ka ras kaan mein dalne se bhi dard dur hota hai.
  4. Hydrogen peroxideki 2-3 drops kaan mein daalkar kuch der baar gun gune pani se kaan ko dhone par mail aur doosre gande padarth  bahar nikal jate hein aur ear saaf ho jata hai.
  5. Hamesha jis kaan mein dard hai use oopar ki taraf karke soyein. Isse uspar pressure kam hoga falsavroop aapko pareshani kam hogi.
  6. Kabhi bhi teekhi cheez ya pen, pencil, match stick, tooth pick jaise cheezein ear ko saaf karne ke liye use na kariye. Isse kaan mein ghav aur infection to hote hi hein saath mein eardrum fatne ka bhi khatra rehta hai.
  7. Apni diet mein vitamin C yukt foods ko shamil kariye. Isse aapko infection hone ka khatra kam hoga saath mein aapko sardi jukham bhi nahi lagega.
  8. Swimming pool mein jane se pehle apne ears mein thoda sa til ka tel ya mineral oil daal lijiye. Ye aapko infection se bachaega.
  9. Allergy bhi kaan mein dard ka ek mukhya karan hai. isliye aapko un sabhi cheezon se bachna chahiye jinse aapko allergy hai.
  10. Plane mein chewing gum chabate rehne se kaan me dard nahi hota.
  11. Hamesha apne face ki tarah aapne ear ki saaf safai par bhi dheyan dijiye taki future mein infection ya doosri problems na ho paye.
  12. Samay samay par doctor ke paas ja kar apne kaan ki safai karvate rehna chahiye.
  13. Sadak chap safai walo se kabhi bhi ear saaf na karvaiye. Isse badi infection hone ya ear damage hone ka khatra rehta hai.
  14. Kabhi bhi doosro dwara use ki gayi earbuds ya koi doosri cheez apne kaan mein daalne se bachein.Aisa karne se infection failta hai.
  15. Rojana exercise kariye jisse aapka immune system strong banega aur aapko ear related problems nahi hongi.
  16. Chote bache ko doodh pilate samay kabhi bhi use leta kar doodh nahi pilana chahiye. Aisa karne se doodh uske inner ear mein ja kar uske kaan mein dard kar sakta hai. Hamesha god mein letakar use feed kariye.
  17. Sanan karne se pehle apne kaan mein cotton baal daalne se sabun aur doosre irritants aapke ear mein nahi ja payenge.

Kaan mein dard ke ilaj, gharelu upay aur upchar ke tarike aap dheyan se padh kar try karke dekhein. Humein aasha hai ki aapko jaroor kuch rahat milegi. Agar aisa na ho to kisi ENT specialist se milkar dawa lein. Dua aur mantar ke chakkar mein na pade.

लोगों की इतनी help की लेकिन youtube चैनल subscribe किसी ने नहीं किया अभी तक

 

loading...

LEAVE A REPLY